MANUTUO BATANG BUINGIN  

1358

 

Potang Komi nan gerimis.

Ocu Sanggam tonga maasa Canduong Panjang nan lalamo indak tapakai. Di koniong Ocu Sanggam manitiok poluo, mailiu ka toliu sudatu inggok di kalepak baju Kaus Itam Ocu Sanggam. Inyo Nampak sodang serius bonau.

            Disampiong kanannyo nampak saungguok api unggun tonga manyalo ancak. Sobab disampiong kayu pambakaunyo daghi Kayu Ubau, ditamba dek tampuwuong koghiong le, hinggo nyalonyo manjadi ancak.

“Ngapo du, Cu Sanggam?” Tibo-tibo Pak Suman tatangganyo mahampiri Ocu Sanggam sambio mandokek.

Cu Sanggam baonti sajonak maasa Canduong, “Eh Pak Suman. Iko ha, maasa Canduong. Lalamo ndak bapakai ndak saketek kaghek’e kosan, do. Tang mano Pak Suman Cako, go?” Ocu Sanggam baliok batanyo.

“Tang siton, nengok ungguok batu jo kosiok den. Tingge saketek batu jo kosiok le, nan piti piutang daghi kontraktor noji bulio bau,” Jawab Pak Suman. Inyo pun mancangkuong ndak jauo daghi muko Cu Sanggam.

“Samo tio awak dunyo Pak Suman. Piutang ndak ketek banyak’a do. Tapi sapaya-paya managio ka ughang dudo,” Nyie Cu Sanggam manimpali.

“Bahiyo-hiyo bonau maasa canduong, ma Cu? Untuok apo? Khan maompuok ladang baghu?” Tanyo Pak Suman baliok.

“Ndak do, Pak. Ton ha, batang Buingin di suduik pakaghangan den, la godang banau. Indak bulio sampai talalu godang, do. Beko banyak manyimpan hantu. Makonyo nakkan den tutuo,” Nyie Cu Sanggam.

“Siapo pulo nan manyobuik boso batang Buingin banyak bahantu go, Cu? Nan tidak-tidak ajo du do. Kalau bacuito hantu awak dimano-manopun pasti ado makholuok alui, du. Tamasuok dalam dighi awak go juo banyak hantu,” Ule Pak Suman.

“Ndak nyie deyen di Batang Buingin du nan banyak Hantu du do, Pak Suman. Nyie ughang lain, tamasuok nyie Mintuo Tino den. Inyo dutio nan seso manyuwuo den manutuo Buingin, du,” Kato Cu Sanggam baliok. Dibasuo deknyo canduong nan sodang baasa du jo ayu dalam timpuwuong. Ayunyo pun la mulai kowuo dek kaghek.

Pak Suman maongguok-ongguok balam. Nta apo nan tapikiu dek Pak Suman kutiko itu, Nyie bathin Cu Sanggam. Pak Sumanpun baniat nak baghanjak.

“Jadi waang tutuo Buingin dunyo Sanggam?” Mintuo Tino Cu Sanggam tibo jo Mi’a bini Cu Sanggam. langkah kaki mintuonyo agak nonek, “Jan sampai ndak batobang pulo le, ang,” Pinto Mintuo Cu Sanggam banado garotak.

“Iyo tio, Cu. Tobang la copek Buingin, du. Pado awak nan seso dikudian aghi dek’e,” Bini Cu Sanggam ikuik bacuito. Koniong Cu Sanggam kowuik.

“Nde ‘A… Iko sodang maasa canduong ntuok manutuo Buingin du tio, ma ha,” Ocu Sanggam nampak seso dek mintuo jo bininyo. “Canduong go harus diasa tajam-tajam, supayo manutuo Batang Buingin du copek. Sobab nyie ughang manutuo Batang Buingin go banyak nan ndak sampai putui. Dek itu du tio, banyak hantu….” Nyie Cu Sanggam sambio mampalelok bagho api nan mulai mangetek.

Ndak lamo kamudian, Ocu Sanggam mamasuokkan canduong nan la baasa tadi kadalam gagangnyo nan la baisi kara-kara, sabagai lem palokek ulu jo canduong.

Ccssss…

Canduong Cu Sanggam nan samulo majal, kini la tajam jo ulu-ulunyo nan ancak pulo. Ndak lamo kamudian inyo manuju Batang Buingin di suduik pakaghangan umanyo. Diikuiti dek Mi’a jo amaknyo.

Pak Suman pun mintak pai, ka Ocu Sanggam, “Den pai dulu yie, Cu Sanggam. Ado urusan ketek, ha,” Nyie Pak Suman.

“Yoolah, pak. Elok-elok jalan muo. Jan dipikiun bonau piutang dule. Nan zoki awak du, indak kan kamano juonyo, do.” Nyie Cu Sanggam sambio maayun canduong panjang nan tajamnyo ka antiong-antiong batang Buingin.

Ndak lamo kamudian Canduong Cu Sanggam malosa-losa manutuo Buingin. Ndak ado halang jo rintang. Batang Buingin du la tinge batangnyo sajo nan tatogak. Daun-jo ghantiongnyo lalosap dek canduong Cu Sanggam. Kacomesan yang manggayuik dibonak Cu Sanggam ilang suda. Ghisau ati dek takuik-takui Batang Buingin du ndak omuo tumbang la pudau.

Sasuda Sholat Mugoghib, Ocu Sanggam jo bininyo nampak manyantap makan malam jo mintuonyo. Panggang ikan Kupiek jo sambal Asam Duyan mambuek saleso makan Cu Sanggam. Ndak paduli jo mintuonyo nan sojak tadi manengok minantunyo makan lomak.

“Lomak makan condo yie, Cu? Tamba nasi, le?” Tanyo Mi’a. Ocu Sanggam mangeleng-geleng ketek.

“La ompek pinggan makan batambuo juo du le…” Amak Mi’a basuagho. Ocu Sanggam saketek tasentak. Kamudian  inyo maminum ayiu putio mampalancar kunya nasi taakhir. “Ndak, le Mak. Iko ntah dek suda manutuo Batang Buingin go gak’a lomak makan deyen. Nta dek amak sasamo jo kami makan malam go gak’a,” Nyie Cu Sanggam mamandang ka mintuonyo.

Sasuda makan malam, katigo buanak du nampak talibat pabincangan ingan. Ocu Sanggam manyandau di Kurisi Otan nan baghu dibolinyo. Mi’a duduok disampiong lakinyo. Samantagho mintuo Cu Sanggam duduok ndak jauo daghi Mi’a sambio malipek daun sighio bacampu jo kapu saroto gambiunyo.

“Mak, kalau bulio den batanyo ngapo dek osa bonau dek amak manyuwuo den manutuo Batang Buingin, du?” Tanyo Cu Sanggam mamulai pabincangan.

Mintuonyo diam sakojap. Inyo nampak mangunya-ngunya Sighio. Muluiknyo nampak manyigha dek ayiu Sighio. Kamudian inyo bakato, “Sabonau ndak talalu pontiong waang manutuo Buingin du do, nak. Cuito ughang nan mambuak amak poniong, boso Batang Buingin du bahantu kalau la godang. Daghi pado amak poniong dek mamikiun kato ughang, elok amak suwuon bonau waan manutuo batang du, le.

Ocu Sangam saliong pandang jo Mi’a bininyo.

Mintuo Cu Sanggam malanjuikkan, “Nyie ughang Buingin du memang ancak untuok batoduo. Kamudian ancak juo untuok paambek angina koncang. Tapi kalau nak waang tontu Buingin du kalau la godang mako akan mambo panyakik ka awak. Condo sakik katogughan, domam, jo pilek dan sabagainyo,” Nyie Mintuo Cu Sanggam.

Sajonak mintuonyo maluda. Ocu Sanggam maiwuik okok Dji It nan kini la batukau jo okok Dji Sam Soe. Lanjuik Mintunyo, “Banyak macam hantu nan manunggui Buingin du nak. Sodo hantu du ndak ado nan elok puangai, do. Ado nan namonyo pocong, kuntil anak, hantu polong dan sabagainyo. Yo kalau bulio awak ibaratkan hantudu condo parampok, panipu, mambuek sansagho rakyat jo jonji-jonjinyo. Itupun kodok hantu samo hantu balago dek bedo politik. Apolagi kalau di Batang Buingin du la inggok pulo Burohan,” Nyie Mintuo Cu Sanggam.

“Apo pulo Burohan du, mak?” Tanyo Mi’a panasaran.

“Burohan du Buruong Hantu kapanjangannyo, nak….” Jawab mintuo Cu Sanggam. Ocu Sanggam mamandang ka bininyo.

“Sodangkan lai indak ado Burohan di Buingin du la banyak juo hantunyo, apo lai la ado pulo Buruong Hantu, tontu Buingin du tamba angker. Karono tiok malam bunyinyo mambuek bulu kuduok maomang,” Nyie Mintuo Cu Sanggam baliok. Kamudian inyo baghanjak maluda ka sampiong uma.

Ocu Sanggam jo Mi’a untuok kasekian kalinyo saliong pandang. Ndak tontu nan kan dikatokan dek kaduo laki-bini du, do. Mi’a baghanjak ka dapu maambiok wuduok Shalat Isya. Ocu Sanggam tingge soghang tasandau masih mamikiun kato – kato mintuonyo barusan. “Kamano adok’o pambicaraan mintuo den tadi gak’a yie,” Nyie bathin Cu Sanggam. -*** (Penulis adalah Pengarang Pertama Kamus Bahasa Ocu Kabupaten Kampar)

 

Komentar Facebook
BAGIKAN
Artikel SebelumnyaKONO WAWANCARA
Artike BerikutnyaTUGAS NEGARA