KONO WAWANCARA

1029

Ocu Sanggam takalenjek godang. Kutiko inyo didatangi dek sughang wartawan. Ucok namo wartawan du. Walau parasaan Ocu Sanggam agak heran dek kadatangan wartawan, Inyo bausaho manyambunyikan parasaan dengan basikap santai ala anggota DPRD yang diwawancara wartawan.

            “Ocu Sanggam….” Wartawan Ucok mamulai.

“Yo, deyen…” Jawek Cu Sanggam singkek.

Ucok nampak mampaelok duduok nak yo lomak duduoknyo, “Nampaknya kehidupan Ocu cukup keras. Gimana komentarnya?” Tanya Wartawan Ucok.

“Ndeh, nantik daolu. Sabolun den jawab tanyo pak wartawan, bulio den batanyo dulu?” Ocu Sanggam malah batanyo. Koniong Ucok saketek bakowuik. Tapi inyo kamudian nampak tasenyum-senyum.

“Apa itu, Cu Sanggam?” Tanyo baliok wartawan Ucok.

“La buapo taun pak wartawan tingge di Nagoghi Kampar nan tasobuik nagoghi Ocu, go?” Tanyo Cu Sanggam agak sarius.

Koniong Ucok nampak kowuik baliok. Tapi inyo manjawab juo, “Dah lima tahun..” Jawabnyo singkek.

“Haa, ngaroti gak’a bahaso ughang Ocu nyo kan? Kalau lai ngaroti, jo bahaso Ocu sajo pak wartawan mananyo den, nak bulio nyaman ghaso wak bacuito, yie…” Kato Cu Sanggam baliok.

Ucok maongguok-ongguok balam. Kamudian inyo mangolun kuote catatan jo pena pilot. Ocu Sanggam manengok gerak-gerik wartawan Ucok.

“Di kuote ‘jo batuli wawancara awak gonyo pak wartawan? Ndak sala tuli bekok gok’o do?” Cu Sanggam tibo-tibo batanyo. Ucok nampak takojuik saketek. Inyo kamudian senyum pulo.

“Jan Ocu Sanggam khawatir, pena den iko olun pernah salah dalam manulis berita, le…” Jawek wartawan Ucok mambale. Logat bataknyo masih jole tadongau. Jadinyo bahaso Ocu nan diucapkannyo agak ganjie. Kini giliran Ocu Sanggam nan maongguok-ongguok. Mulailah Ucok batanyo ka Ocu Sanggam.

“Nampaknyo kehidupan Ocu Sanggam cukuik koreh, ya?” Tanyo wartawan Ucok kurang pas berbahasa Ocu.

“Iyo koghe… bayangkanla dek pak wartawan du ha, batu jo kosiok nan den buek untuok mambai iduik kaluarga,” Jawab Cu Sanggam lugu, “Khan koghe kosiok jo batu du dek pak wartawannyo kan?” Untuok kasakian kali Ocu Sanggam batanyo. Wartawan tadi tasenyum baliok agak manggeleng.

“Ha, baapo pulo dek manggeleng. Indak tio koghe kosiok jo batu dek pak wartawan du?” Ocu Sanggam batanyo sarius.

“Ndak condo itu do Cu Sanggam. Gelengan kapalo den tadi bukan baindak. Tapi manengok Ocu agak lucu rasonyo?” Kata Ucok lagi-lagi ndak pas mangucapkan bahaso Ocu.

“kalau bulio den batanyo ke pak wartawan, kan lai ngaroti jo adat Kampar gonyo kan?” Kambali Ocu Sanggam batanyo. Ucok tampak maongguok sakali. “Kalau Baitu, Pak wartawan Ucok lai punyo suku gak’a gonyo kan? Nyo kalau dalam adat Ocu ugahang pandatang indak kan dianggap pandatang le kalau inyo la punyo suku di Kampar go. Jadi dalam istilah kampuongnyo pandatang harus pulang sanak atau pulang dunsanak. Artinyo mancai induok tompek inggok, baitu pak wartawan Ucok. Kan lai basukunyo kan?” Tanyo Cu Sanggam baliok.

Wartawan Ucok sakaliko senyum kocuik.

“Apo suku Cu Ucok?” Tanyo Cu Sanggam.

“Wakotu deyen olun lamo tibo disiko den kenal jo Datuok Ahmad. Inyo basuku Putopang Basa, jadinyo den pulang bainduok ka bininyo. Jadi kan den langsung punyo keluarga. Dan dapek suku Domo mangikuik suku bininyo Tuok Ahmad,” Kato Ucok mancubo saketek bacuito.

“Nah, condo itu kolian pandatang. Kalau nak manotok di Kampar, kolian tu harus punyo suku, pulang bainduok dulu. Suda itu dengan sandighinyo kolian indak dianggap ughang lain di Kampar do. La jadi dunsanak. Artinyo kini awak go pak wartawan la basumondo. Nyo suku den Bendang sodangkan bini den basuku Domo,” Kato Cu Sanggam maulukan tangan nak bajawek  tangan.

“Kalau baitu Ocu Sanggam, kini awak la badunsanak yie…” Kato Ucok sakononyo.

“Itu botue, awak la badunsanak kini. Ado nak den katokan ka Ocu Ucok kini go ha. Itu, tontang cuito awak tadi, kalau bisa kami baharap kek Ocu Ucok bailah pengertian kapado ughang-ughang Cu Ucok nan kabanyakan. Ughang Ocu du elok-elok. Ramah-ramah, omuo badunsanak, kalau lai nak badunsanak pandatang go. Ijan condo dunsanak Cu Ucok nan kabanyakan, sasuda punyo tanah di Kampar nak batamba lowe jie tananyo. Parahnyo la maghaso banyaknyo, malopu pulo ka ughang Kampar. artinyo kalau bulio pulu sumando nak mambai pengertian ka Cu Ucok. Banyak nan tajadi di kampar Go, ughang batak apo nyie ughang batak sajo, indak paduli jo sakuliliong do,” Kato Cu Sanggam serius. Baitu juo jo Cu Ucok yang kini wawancaranyo taonti. Nta siapo nan mawawancara siapo kini du.

“Apo du, Cu…” Tanyo Ucok.

“Contoh ketek lah den bai ka Ocu Ucok yie. Di Salo ton. Dunsanak-dunsanak Ocu nan daghi batak nan juo tinge di salo ton, indak condok’o nak manghargai ughang Ocu di sakuliliong. Kok dapek jam limo potang organ jan sampai juo babunyi di acara baolek ughang batak dule. Jam limo du ughang Ocu jo tatangga lain nak Shalat Magrib. Tolong sobuikkan ketek ka ughang batak-batak nan indak tau diuntuong du do muo…” Pinto Cu Sanggam. Ucok takojuik juo mandongau kato-kato cu Sanggam.

“Jan sampai pulo ughang Ocu jo Ughang minang nan la jadi masyarakat Kampar go, maghaso tasingguong. Beko jadi payah awak. Jadi basalisio poham. Khan ngaroti Cu Ucok dunyo?” Kato Cu Sanggam kambali batanyo. Nampaknyo wartawan Ucok nan konai wawancara. “Itu harapan deyen jo kami nan kabanyakkan du pak Wartawan Ucok…” ingek Cu Sanggam.

“Yolah Cu Sanggam,”jawek Ucok singkek.

“Ha, Mantap. Yo condo itu. Pakai pepatah ughang tuo-tuo wak dulu, dimano bumi dipijak, disitu langik dijunjuong. Jan dibaliokkan pule le pepatahdu manjadi dimano langik dijunjuong, disitu bumi dipijak-pijak…khan baitu?” Nyie Cu Sanggam baliok.

“Oke Cu. Jadi wawancara awak tadi condo apo?” Tanyo wartawan Ucok.

“Ndeh jan barita-barita ingan Ocu Ucok angkek le Cu. Tapi angkekla barita-barita politik yang punyo nilai investigasi tenggi… muo,” Nyie Cu Sanggam. “Kalau Koran Cu Ucok hanyo berita-berita ketek jo berita seremonial, noji kan dibaco dek ughang do…” Kato Cu Sanggam baliok maelak. Tinggelah Ocu Ucok tasenyum kucuik sambio maiwuik kopi hitam nan sadaghi tadi di hidangkan dek bini Cu Sanggam Mi’a.***

 

Penulis adalah

Pendiri THEATRE BANGKINANG PROJECT.

Komentar Facebook
BAGIKAN
Artikel SebelumnyaJAN PICAYO
Artike BerikutnyaMANUTUO BATANG BUINGIN