DI TOPI SUNGAI KAMPAU

29
Sajam lai, jolang Mugoghib…
Tido kato nan dapek kolu daghi muluik Ocu Sanggam. Pandangan matonyo manyapu sakuliliong Kampau. Sobua sompan kociok tongah dielo dek ghang bujang tangguong. Sakitar ompek bole taun umunyo, Ocu Sanggam mambatin. Baapo tio dek dielo dek ‘nak bujan du? Sompan kociok du baisi duo ughang kociok-kociok. Dek ayiu Kampau di situ agak singkek namun doghe, ndak pulo tagalakan dek inyo sompan du do, makonyo inyo maelo sompan.
“Paliong-paliong pajie du sampai diujuong booting du baghonti sakojap malope ponek manyusun ongok,” Tibo-tibo Mi’a bini Ocu Sanggam basuagho. Ocu Sanggam ndak takojuik, sobab inyopun bapikighan samo. Inyo pandang Mi’a jo senyum kucuik.
“Hebat juo adiok yo diok. Bisa pulo samo pikighan awak,” Sawuik Ocu Sanggam mamandang pa-pajie disuboghang ‘ton.
Suasana potang itu du, taghaso agak lambek bajalan dek Ocu Sanggam. Mi’a pun batanyo, “Ado nan ndak salosai dikikigho Ocu adiok ghaso. Kok lai bulio adiok tontu, apo tio du Cu?”
“Ndak ado do, diok…” Jawek Cu Sanggam.
“Hmm, bakile Ocu ma yiee, hihii..” Mi’a mancubo bamanjo.
“Hemm… Ha, kan, baghonti pajie tu maelo sompan,” Ocu Sanggam Manahan pokiok, dek nan dikighonyo du memang tajadi. Mi’a pun mamandang ka suboghang.
“iyo, kan, Cu. Ponek tio pulo dunyo. Pajie keniong maelo sompan di ayiu doghe condo itu. Tapi daghi cagho maelo sompan, la biaso anak bujang dunyo, Cu,” Kato Mi’a. Ocu Sanggam maiyokan.
“Sonang ati Ocu, diok,” Ocu Sanggam lansuong maule cuito tadi. Mi’a saketek bakowuik koniong, “Ati sonang tapi baapo jak’a dek condo ughang mumuok Ocu deyen ‘ko, naang,” Mi’a mulai mamanjo-manjo baliok.
Ocu Sanggam maelo ongok. Dipandangnyo muko ghang umahnyo ‘ko lok-elok. Padusi nan disampiongnyo iko, tamba bacahayo mukonyo nampak dek’e, ”Sonang ati Ocu ndak lain ndak bukan dek Kampau awak go, lah mulai Nampak titiok toghangnyo, diok,” Kato Ocu Sanggam mauba cagho duduok. Inyo maadok badopan jo Mi’a yang la duo bole taun basamonyo.
Mi’a ndak basuagho. Matonyo pun saolah maminta kato-kato Ocu Sanggam balanjuik.
“Kok salamo iko, ongok awak kodok tatahan, hawatir jo maso dopan Kampau, kini la bisa awak maelo ongok dalam-dalam,” Sambuong si Ocu. Mi’a mandongau, “Lai kosan Allah SWT mandongau pintak jo pinto awak basamo. Mudah-mudahanlah diok, nagoghi awak ‘ko lai kan bauba nosibnyo. Kok kan bauba, bauba ka nan eloklah sodio Kampau ko.
“Iyo dunyo, Cu. Kok salah wak pabaiki. Kok kughang wak tukuokki. Nan tabedo dipaelok. Kok salamo ‘ko kowuo wak pajonio, Cu. Kan baitu?” Nyie Mi’a maule kato.
“Ooii, ghang uma ambo ko, pandai juo kosan, manyusun kato, yie. Hhngg, ngoman den nengok’o,” Ndak tahan dek Ocu Sanggam, inyo cubik sayang ghang umanyo ko, sudatu bakato, “Pangalaman jadi guru hondaknyo. Ambiok tua ka nan monang, ambiok contoh ka nan suda. Di pamimpin awak kuncinyo dule. Bak kato ughang awak sesuok, diok, Bajalan lueui bakato bonau. Itu harapan awak ka pamimpin di Kampau ko. Kok bagi awak rakyatnyo, muo basamo-samo mandukuong pamarintahannyo ko,” Kato Cu Sanggam.
“Kokpun inyo salah bajalan jo mambuek kabijakan, samo-samo pulo wak ingekkan. Kan baitu Ocu?” Kato Mi’a baighiong tanyo. Danpun kalau saighiong mustilah sajalan,” Tukuok Mi’a.
“Botue, aghok tio kigho-kigho awak nengok Kampau tonang, aman, jan sampai nan ado mangguntiong dalam lipatan, antagho pamimpin jo wakil rakyat. Jan ado sakwa sangko nan buwuok di sasamo kito,” Ocu Sanggam maontikan kato. Mi’a pun baitu.

Kadunyo tadiam. Kicau buwuong laying-layang di topi Kampau du, indak manghalangi dongau suagho ughang ko baduo dipotang jolang sonjo ‘ko. Ocu Sanggam batanyo, “Malam jum’at ‘so malam iko yie, diok?” Nan ditanyo indak manjawek. Cubik bapilin nan manjo tibo di longan Ocu Sanggam.***

Komentar Facebook