DEK NAK BABINI DUO

644

Lalamo indak tadongau kabar berita daghi Ocu Sanggam. Ontah apo kabar gak’a, kini muo wak jonguok Ocu Sanggam di kadiamannyo. Hmm… Ocu Sanggam sodang bamonuong di dopan umanyo. Okok indak putui baisok batang demi batang.

Kasimpulannyo, Ocu Sanggam maongguok-ongguok kociok. Inyo imbau anaknyo nan kini lah baumu ompek taun. Namonyo Anwar, “Nuar, komai waang sakojap, nak,” Ucap Cu Sanggam indak manggaghik daghi tompek duduoknyo. Nan diimbau pun tibo, “Apo aya…?” Nyie anak patamo Ocu Sanggam jo Mi’a. Ocu Sanggam indak langsuong manjawek tanyo anaknyo. Dipandang dek inyo anak bujangnyo nan sodang tumbuo-tumbuonyo jo lucunyo.

“Pai mandi la, suda itu sap-siap anak bujang ayah, ‘lio wak ka Musojik, yie nak…” Pinto Ocu Sanggam lombuik maajak anaknyo ka Masojik sumbahyang Magrib.“Mangapo wak ya, di Masojik du?” Tanyo si Anwar baliok indak pue dengan panjelasan ayahnyo.

“Hmm, sumbahyang mugoghib awak, suda itu ado wirid pangajian juo. Ajak amak waangmuo,” Nyie Cu Sanggam Liok. Olun lope ongak Cu Sanggam, Mi’a manjawek daghi pintu dopen uma, “Ndak bisa den pai do Cu. Biasolah ‘ghang padusi…” Kato Mi’a. Cu Sanggampun indak panjang cuito. Ngg, awak jielah nak pai yie. Amak waang indak bisa pai dek’e do,” Anwarpun maongguok. Inyo pai masuok kadalam uma langsong mandi. Di Musojik, abi sumbahyang Mugoghib, acara dilanjuikkan jo Wirid pangajian. Caramah Ustad nan masih mudo itu maambiok Tema manyayangi Oghang Tuo. Minik demi minik, Ocu Sanggam mangikuti ceramah jo jamaah lain.

Buya itu mangecek, “……..Ibumu, ibumu, ibumu barulah bapakmu……..” Kato kato itu nan paliong jole masuok sok utak Ocu Sanggam. Pun salosai shalat / Sumbahyang Isya, kasodo jamaah pun pulang.

Tibo diuma nasi lamasak, tinggalle mambuek pakanasi nan sodang dalam proses. Ocu Sanggam duduok agak tasandau di ruang tonga. Anwar main tor-motor jo pasawat di dopan Ocu Sanggam.

“Anwar, komai kojap young,” Panggio Cu Sanggam. Anwar pun mandokek. Ocu Sanggam pun batanyo, “Apo nyie caramah buya di Musojik tadi, Nak…..?” Tanyo Ocu Sanggam.

Mi’a dibalakang mandongaukan. Si Anwarpun manjawab, “Ibumu, ibumu, ibumu, barulah bapakmu…..” Nyie Anwar polos mamakai bahaso pajie kociok.

Ocu Sanggam maongguok-ongguok sudatu batanyo baliok ka Anwar, “Baghapo amak disitu nyie nak? Tanyonyo baliok. Anwar maetong-etong. “Tigo kali amak disitu, ya,” Kato Anwar polos.

“Di uma iko baghapo waang maimbau amak?” Tanyo Ocu Sanggam baliok. Atinyo agak badobuok batanyo condo itu.

“Sakalinyo, ya,” Jawab Anwar pendek. Ocu Sanggam maongguok-ongguok. Tu nyie Cu Sanggam kaanaknyo, “Pai sobuikin ke amak waang muo,” Pinto Ocu Sanggam yang dsambuik dek Mi’a copek.

“Komaila nak, komaila…” Kato Mi’a daghi dapu. Anwarpun polos, lugu ndak au apao-apo jo politik amak jo ayahnyo, satongah balaghi ka dapu. Olunleh mangecek Anwar, Mi’a lobio dulu batanyo, “Iko apo namo go nak?” anyo Mi’a manunjuok ka buah sayu-sayuran.

“Toongak, tongak namonyo, mak…” Jawek Anwar.

“Kalau dikoghek dua kali jadi baghapo, young?” Tanyo Mi’a agak manggogham.

“Jadi tigola inyo mak,” Jawab Anwar lagi-lagi polos.

“Hmm… pai sobuik’in kek ayah waang..” Pinto Mi’a manyuwuo Anwar. Si anak bujang ko pun balaghi ka ayahnyo. Sampai di ruang tongah tadi, Ocu Sanggam ayahnyo ndak ado di situ le do. Nyo masuok kadalam kamar.

“Ndek na’ang… pado takoghek tigo sibuyuong den ‘ko, lobio elok jan babini duo le na’ang.

Condo indak bias manyobuik jo sindiran do, apolagi kalau den sobuik langsuong-langsuong, hondek-ondek e…” Nyie Ocu Sanggam dalam ati.

Malam makin lawuik, makan malam ala suda. Anwar pun ala lolok. Ocu Sanggam lobio dulu mambaghiongkan dighi ka kasur. Disusul dek Mi’a. indak banyak cuito nan maluncu daghi bibiu kaduonyo.

“Mi’a, Pisau cuku potang masih lai le, ‘A?” Tanyo Ocu Sanggam. Mi’a sakojap kowuik omannyo. Batanyo-tanyo dalam atinyo, untuok apo pulu laki den ‘ko nanyokan pisau cuku? Kato Mi’a tapi dalam ati. “Ntuok apo, Cu?” Mi’a batanyo akhirnyo. “Ntuok mancuku jangguik den ko ha, lapanjang bonau. Li-sakali nak den cuku. Nak lio sojuok ghaso dagu den go,” Kato Cu Sanggam hanyo manengok sakojap ka oman bininyo.

Tanpa pikiu panjang langsuong manjawek, “Apo dek dicuku pulo Cu. Ancak Nampak dek den ocu bajangguik dumanyo. Lagi pulo bajangguik du kan sunnah Rasul awak,” Kato Mi’a polos.

“Condo iko diok, kalau malakukan sunnah itu du, jan sociek-sociek,” Ocu Sanggam baghonti sakojap, “Tu jan cuku jangguik ocu gole dek malakukan sunnah Rasul?” Tanyo Cu Sanggam.

“Jan cuku, le Cu,” Jawab Mi’a indak mangaroti.

“Tu, sunnah Rasul nan ciek lai bulionyo?” Tanyo Cu Sanggam agak manggegek.

“Nan mano du?” Tanyo Mi’a panasaran.

“Namba amak Anwar, kan sunnah Rasul juo du…” Agak tasondek ongak Ocu Sanggam.

Mi’a duduok daghi baghiongnyo. Inyo pandang lakinyo lok-elok.

“Memang nak di koghek bonau ‘bondo’ Ocu du. Tambala bini, tapi nan sociek itu du pasti bakughang do gok’o…” Mi’a mangamuok.

“Indak….indak do….. Ampun den kalau baetuuuuuuuu……” Pokiok Ocu Sanggam tatahan.)***

Penulis adalah :

Pemred SANGGAM.info

 

Komentar Facebook