DEK BAPOLITIK Oleh: SYAIFULLAH  

1255

            Pagi iko Ocu Sanggam ka Bangkinang. Inyo pai managih piutang jue boli kosiok jo batu usahonyo.  Tapi nampaknyo saloju pai, saloju itu pulo pulang. Apolai koniongnyo bakilek dek poluo. Koniongnyo pun bakowuik.  Dek apo gak’a? muo wak towuikan kisa iko.

            “Konciong gak’anyo Pak Itam go. Cora indak saketek. Nan mancaleg jielah. Akan manjadi anggota dewan jolah. Akan jadi ughang tapandang pulo suda itu. Nyie inyo. Tapi nan jole, piutang yang ditagih indak juo dapek do,” Ocu Sanggam mangutok soghang.

Inyo takonang wakoti di uma Pak Itam cako. Wakotu itu Pak Itam sodang duduok santai disofa tamunyo. Didopannyo duduok Cu Sanggam. “Kini awak sodang bajuang Cu,” Nyie Pak Itam bambukak cuito, “Bajuang untuok manjadi Anggota dewan terhormat,” Nyie inyo baliok. Ocu Sanggam mandongaukan serius.

Sasudah awak manjadi anggota dewan, mako perjuangan salanjuiknyo adolah gonti mamparjuangkan aspirasi masyarakat ketek, yo condo aspirasi Ocu Sanggam lah. Kan iyo tio du Cu” Kato Pak Itam yoking sambio batanyo. Kamudian maambiok dua puluo olai kelander. Sudatu dibaikannyo ka Ocu Sanggam.

Ocu Sanggam maongguok-ongguok kociok. Lalu ditaimonyo kalender du. “Ntuok deyen go Pak Itam?” Tanyo Cu Sanggam. Pak Itam maongguok.

“Kan den baapokan kalender sabanyak iko go Pak Itam?” Tanyo Cu Sanggam luwui, “Banyak bonau go,” Nyie Cu Sanggam pulo.

“Ha, untuok siapo pulo le kalau bukan untuok Ocu Sanggam jo tetangga sakuliliong. Bantu dek Ocu den mambagikan kalender du ka tatangga, suda itu pitawuokan ka tatangga du, boso jan lupo manyucuok Pak Itam dengan nomor urut tigo. Muo,” Pinto Pak Itam.

Ocu Sanggam takalenjek, “Baapo jak’a Pak Itam, den komai bukan untuok mancai kalebder lalu dibagikan di tatangga, tapi komai untuok mananyokan piutang deyen potang. Siso pambolian kerekel jo kosiok untuok proyek Pak Itam babaghapo bulan lalu,” Kata Cu Sanggam mengutaghokan niatnyo.

Gantian Pak Itam nan takalenjek. Namun inyo tasenyum kamudian, “Ooh… Ocu Sanggam. Deyen minta mo’o du Cu. Karono condo nan nampak dek Ocu kini den sodang mangusahokan untuok manjadi anggota dewan. Bajuang awak. Utang ka Ocu Sanggam den akui. Tapi mohon basobau dulu yie,” Pinto Pak Itam.

“Jan condo  itu bonau le Pak Itam. La lobio tonga dua taun utang du ma. Lapatuik pulo ghaso deyen managih piutang du. Koniong Cu Sanggam ndak salosai. Mukonyo manyigha. Manahan anta bongi onta kosal.

“Baiko caghonyo Cu Sanggam. Kini den minta wakotu ka Ocu supayo utang deyen du ditangguokan manjolang suda pamilu yang ‘kan datang.  Baapo caghonyo cu, deyen bausaho bonau untuok duduok jadi angota dewan. Tolong den cu, yie…” Nyie Pak Itam mayokinkan Ocu Sanggam nan tamonuong mandongau kato-katonyo.

Tibo-tibo anak Pak Itam nan sakolah di SMA datang mamasuoki ruang tamu, “Ya, mintaK piti tuok mambayu SPP. La tigo bulan ndak babayu, malu den kakawan diimbau towui dek guru,” Nyie anak Pak Itam maengek.

Koniong Pak Itam kowuik, “Nde nak. Jan kini pulo le. Bisuok-bisuok la. Aya sodang indak bapiti kini do. Sobau dulu yie…” Lanjuik Pak Itam. Anaknyo nan padusi du kamudian pai jo koniong ndak salosai.

Mandongau parcakapan itu bathin Cu Sanggam bakato, “Iyo tio ndak bapiti Pak Itam goma do. Untuok bayu SPP anak jo ndak ado dek inyo do. Apolai untuok mambayu piutang ka deyen,” Nyie Cu Sanggam dihati.

Ndak lamo sasuda itu datang tamu daghi kampuong lain. Tigo pemuda datang mambo proposal Volly Ball. Ughang du minta dibantu tigo juta rupiah. Pak Itam sapakat kalau inyo kan mambantu pemuda du dengan syarat, kalau ughang du harus mancaikan suagho untuok inyo. Ughang du nampaknyo sepakat.

Kamudian Pak Itam ka kakar sabontau. Kamudian datang mambo piti tigo juta upiah. Pemuda tadi nampak tasenyum pue. “Mo kasih Pak Itam, kami batulak dulu yie…” Nyie pemuda tadi.

“Yolah… tapi tolong Bantu deyen mamasang umbul-umbul jo bendera deyen muo,” Minto Pak Itam lalu maambiokkan sejumlah atribut Partainyo jo selebaran pribadinyo. “jan sampai ndak dipasang go, yie…” Ingek Pak Itam. Pemuda tadi maongguok mayokinkan Pak Itam.

Ati Cu Sanggam bakalebuik. “Baapo pulo cagho go. Anak mintak SPP ndak dibai. Tibo ughang nan indak jole dibai piti. Bajuta pulo du. Tuiyo duyie…” Bathin Cu Sanggam.

Sapaninggal pamuda tadi, hand phone Pak Itam badoghiong. Kighonyo daghi Tokoh masyarakat di desa subola. Inyo juo mintak piti untuok bantuan musojik. Pak Itam manyanggupi. Tapi saupo nan tadi juo. Suagho untuok inyo tolong diperjuangkan. Ughang du tadongau sapakat untuok mambantu sabanyak limo juta. Hp-pun dimatikan.

“Ha… limo juta. Banyak du,” Nyie Cu Sanggam jo koniong bakowuik. Inyo pun bapikiu, banyak piti Pak Itam go kosan nyo ha. Tadi nyobuik ndak batipi kek anaknyo.” Kato Cu Sanggam baliok.

Tibo-tibo bini Pak Itam tibo daghi dapu. Inyo minto piti balanjo. Pak Itam nampak bongi, “Jan mintak piti joule ka deyen. Usahokan jolah dulu. Nampak awak sodang bajuang kini go. Usahokan sajolah piti tuok balanjo du dulu,” Nyie Pak Itam satongah manyoga.

Bini Pak Itam takalenjek, apolai Ocu Sanggam. Bini Pak Itam pun baghanjak daghi situ. Cu Sanggam inyo kambali bakato dalam ati, “Baapo cagho go naang, anak minto piti ndak dibai. Bini minto piti lanjo ndak dibai. Tuiyo du yie. Ndak ngaroti den dek’e kini godo ha..” Nyie Ocu Sanggam.

Ndak lamo sasuda itu Ocu Sanggampun nak baliok, “Pak Itam. Utang khan lai baokuinyo khan?” Tanyo Cu sanggam. Pak Itam maongguok copek.

“Isuok jielah wak salosaikan, kalau Pak Itam la bapiti, muo,” Nyie Cu Sanggam baliok. Pak Itam ndak bakato-kato. Diam maiwuik okok Dji-It nan tasolek di jaghi-jaghi tangannyo.

“Kalau baitu, bialah den sobuik’in ka  ughang-ughang boso Pak Itam mancaleg,” Nyie Cu Sanggam yokin.

“Ha, mantap du Cu. Kampanyekan la deyen ka dunsanak ocu du untuok mamilio deyen. Mantap du Cu,” Sambuik Pak Itam gembira.

“Indak untuok mamilio Pak Itam do. Tapi untuok manogan jan pilio Pak itam atau partainyo. Sobab dek bapartai jo mancaleg go Pak Itam jadi indak salosai do. Kalau nak mancaleg juo saharusnyo jan sampai mangganggu sakolah anak. Jan sampai mangganggu pewuok nasi awak. Jan sampai bini ndak ado piti balanjo. Lah matang awak untuok maju dengan figure awak nan lah matang jo mantap baghulah maju mancaleg. Ko indak utang banyak, anak sikola, balanjo dapu tabangkalai pulo du… ancak pulo lambing partai daghi pado bini nampaknyo le, tuiyo du,” Caloteh Ocu Sanggam.

Pak Itam tamonuong indak picayo mandongaukan kato-kato Cu Sanggam baghusan. Inyo indak bias mangecek atak mambale kato-kato itu. Siwuik okoknyo nan batamba koncang.

“Toga dek bapolitik jan jadi tabangkalai awak dek’e Pak Itam. Lah yie den permisi dulu. Kalendernyo sociek jielah den bo. Jan banyak-banyak bonau le. Kabetulan diuma olun ado kalender le. Kalau ado suok, kalender Pak Itam go den compak’n ka sungai Kampau,” Lanjuik Ocu Sanggam Podio. Pak Itam masih tatogun mandongau kato-kato itu. Ocu Sanggam cuek. Inyo pulang ka uma.

Dalam pajalanan pulang inyo manengok tigo pemuda nan minto piti ka Pak Itam tadi sodang mamasang baliho caleg daghi partai nan bukan daghi partai Pak Itam tadi.

“Ha, la konai jue pulo Pak Itam dek masyarakat. Kosan piti nan dicai dek ughang du kosannyo, gasak la du. Aghang abi bosi binaso. Piti abi awak ndak manjadi,” Utok Cu Sanggam.

“Tuiyo du yie dunio,” Koluo Cu Sanggam sambio manggeleng. “Lobio elok piti mancaleg du dijodin untuok modal bausaho. Tonang iduik. Anak bini ndak sansagho dek’e do…” Ocu Sanggam kambali mangoluo.

“Ndeh, ndek’e….” Koluo Cu Sanggam ndak abi-abi.***

 

 

Penulis adalah :

Pendiri THEATRE BANGKINANG PROJECT

Kabupaten Kampar.

Komentar Facebook
BAGIKAN
Artikel SebelumnyaBARONGSAI VS KUDA LUMPING
Artike BerikutnyaJAN PICAYO