BARONGSAI VS KUDA LUMPING

1278

Ocu Sanggam panen raya. Sabulan ko usaho batu jo kosiok Kampau laku koghe. Ndak ketek  ughang nan maorder Batu jo kosiok untuok keperluan Pambangunan Gedung, kantor, jalan dan sabagainyo. Khan APBD ala disyahkan. Proyek-proyek punyo Pemda Kampar lahpun bagulir. Walau para pamborong proyek masih ngutang Batu jo Kosiok, Ocu Sanggam senyum ‘Sumringah’.

“Piti masuok juo le,” Walaupun olun jole dek Ocu Sanggam ontah piti masuok ontah kasus nan kan tibo isuok. Sobab kabanyakan nan tajadi kalau musim proyek banyak tajadi kasus.

            Misalnyo kontraktor mulai nakal, ndak omuo mambayiu utang nan la dibuek. Alasannyo macam-macam.  Mulai piti pencairan  dana proyek macet, sampai pado proyek nan dikojokan luncur untuok tahun dopan. Suda tu Pemerintah Kamparpun dengan ‘Jumawa’ mangatokan, “Jumlah dana APBD awak maningkat, patuik untuok awak syukuri,” Nyie Pemda saola-ola mangatokan itu prestasi gemilang Kampar. Wuih, mamprihatinkan….

Ocu Sanggam tonga mambaliok-baliok kuote Bon kontraktor. Mi’a duduok manjilepok disampiong lakinyo sambio mamogang kalkulator. “La buapo jumlah piutang awak, diok….?” Tanyo Ocu Sanggam datau. Mi’a manengok ka kalkulator.

“Tujuo puluo juta, ompek ghatui  ghibu bau, Cu,” Jawab bini Cu Sanggam.

“Nde, mak banyak kosan le yie, ‘A… Mando’a godang awak kan masuok puaso suok omuonyo Mi’a,” Nyie Cu Sanggam baliok. Sudatu cu bon-bon kontraktor, du dimasuokkan Ocu Sanggam ka dalam Map warna Ijau batulikan Piutang Batu jo Kosiok. Dibawa tulisan itu, ado saketek tulisan nan mangganggu, apolagi kalau Nampak dek kontraktor, ‘Awas jan sampai indak dibayu. Jonji adolah utang, apolagi jonji untuok bayu utang’. Condotulah kigho-kigho bunyi tulisan du.

Sajonak Ocu Sanggam saliong pandang. “Ba’apo jak’a Mi’a, kalau awak baduo pai rekreasi. Pai jalan-jalan ka nagoghi ughang. Supayo utak awak ndak ponek maetong piutang ka piutang awak ka ughang, jo,” Nyie Ocu Sanggam kamudian.

Mi’a  nampak sonang, “Ndeh, ide cemerlang. Lalamo adiok nak dibo pai jalan-jalan. Muola, ka mano wak pai?” Tanyo Mi’a ka Lakinyo.

“Hmm, baiko cagho…. Adiok olun pona naiok pesawat, le khan? Ha, ba’aponyo kalau adiok ka pulau Jawa sodangkan Ocu Pai ka Hongkong,” Usul Ocu Sanggam.

“Ba’apo jak’a dek tapisa-pisa awak pai jalan-jalan go, Cu? Samo-samo la awak,” Nyie bini Cu Sanggam batanyo jo mausul. Dibonaknyo agak ghisau karono sabonaunyo inyo olun pona pai naiok pesawat. Hinggo inyo takuik.

“Ndak, kini khan zaman demokrasi jo zaman saliong picayo. Adiok picayo ka Ocu untuok pai ka Hongkong. Sodangkan Ocu yokin adiok indak kan babuek macam-macam di Pulau Jawa siton, do.  Lagi pulo kalau bapisa-pisa condo itu, khan la samo awak pai kaduo tompek sakalian, karono isuok sapulang daghi jalan-jalan awak bisa babagi cuito. Khan asyik,” Nyie Ocu Sanggam mulai marayu.

“Ndak dek Ocu nak nengok ughang-ughang Cino nan  ancak-ancak, du do Cu?” Mi’a Nampak cemberut.

“Huss… Jan curiga condo itu diok. Apo Ocu ndak maghaso bimbang pulo malope adiok ka Pulau Jawa yang dikenal cowok-cowoknyo ganteng-ganteng. Saking gantengnyo ughang Jawa du, banyak dilirik dalam Pilkada, yo tio khan?” Nyie Cu Sanggam bisiok-bisiok kadongaughan basamangat, tapi saketek tatahan takuik ughang lain mandongau.

Mi’a yang mulai bapoluo nampak maongguok-ongguok balam mandongau kato-kato lakinyo du. Suda tu Nampak ughang baduo du maetong-etong jata untuok dibagi pai jalan-jalan yang suda disapakati.

“Ndak cukuik piti awak ma, do Cu. Ba’apo cagho?” Nyie Mi’a batanyo. Koniong Ocu Sanggam bakowuik.

“Iyo, yie diok,” Ocu Sanggam tamonuong buwuok, “Awak indak ado link jo Kapalo Dinas atau kontraktor kayo do ma. Bak condo anggota-anggota DPRD awak yang manjodin kapalo dinas condo ATM. Bisa juo awak tamba-tamba piti tuok pai jalan-jalan, khan,” Kato Ocu Sanggam.

“Condo ko, jo Cu. Bagaimano kalau awak minjam piti Pak Wali Desa awak. Khan sodang banyak piti kini inyo, du. Kalau la naimo piutang awak jo kontraktor go, wak baliok’n piti Pak Wali du,” Usul Mi’a.

“Pintar bini den. Ide adiok mantap juo du,” Sambuik Cu Sanggam.

Aghi kabarangkatan laki bini du la tibo. Ocu Sanggam la manenteng tas godang jo sabua kaco mato lokek di matonyo. Condo agen FBI kunun. Ocu Sangam manunggu bininyo kolu kamar. Ughang du nak samo-samo manuju Bandara Sultan Syarif Kasim Pokanbaghu.

Ndak lamo kamudian bini Cu Sanggam kolu kamar. Ditangannyo tapogang tas ancak. Ocu Sanggam jo Bininyo samo-samo takojuik, “Haa… condo Akademi Fantasi Indosiar (AFI) nampak dek den adiok go ma. La tereliminasi pulo?” Sindiu Ocu Sanggam.

“Samo waknyo Cu. Sojak bilo Ocu pandai bakaco mato, condo James Bond agen rahasia 007. Ndeh gaya juo kosan loki den bakaco mato yie,” Nyie Mi’a.

“Tontu la iyo, nak bulio sonang manengok ghang gadi di pajalanan. Kalau nengok langsuong kan malu awak. Kalau bakaco mato ndak kan ado nan bongi jo curiga,” Nyie Cu Sanggam baliok agak mentel.

“Ngg, condo itu kosan, yie.” Sahuik Bini Cu Sanggam pasrah.

Di Bandara kosan Bini Cu Sanggam nan baghangkek duluan jo pasawat Lion Air Manuju pulau Jawa, topeknyo Surabaya nan jadi pilihan. Dalam planning Mi’a sasuda Surabaya inyo akan ka Semarang, Yogyakarta dan Bandung. Jakarta ndak ditompuo dek Mi’a do. Lantaran Jakarta la dicap buwuok, banyak parampok nyie Mi’a kalakinyo.

Ndak lamo suda itu, jo pesawat Garuda Ocu Sanggam manuju Hongkong transit di Jakarta. Baghangkekla ughang du basamo-samo tapi lain arah, dengan harapan pulang mambo sajuta kenangan untuok dicuitokan ka kawan-kawan di kampuong saroto sanak saudagho.

Saminggu la balalu. Dalam jadwal pajalanan Ocu Sanggam dan Mi’a bininyo baakhir. Potang Salasa, laki-bini du la tibo diuma. Mi’a Nampak duduok mamakan Bua Anggur ijau. Ocu Sanggam kolu daghi biliok. Kopia nan dibo Sumbayang Ashar masih takonak di kapalonyo. Kamudian inyo duduok di sampiong bininyo.

Mi’a mancubo tasenyum. Ocu Sanggam manyambuik dengan senyum manis pulo. “Ba’aponyo, pajalanan adiok ka Pulau Jawa. Asyik ndak?” Tanyo Ocu Sanggam mamulai cuito.

Mi’a Nampak manolan bua anggur nan mani du, “Ndeh Cu. Walaupun adiok baghu patamo kali manompuo Pulau Jawa, ghaso-ngaso la jadi kampuong awak pulo ‘so. Bayangkan dek Ocu, apo nan indak ado di kek awak banyak basuo di siton,” Nyie Mi’a.

Lanjuiknyo, “Gedung-gedung godang, tenggi. Tugu Monas nan tenggi. La sampai pulo adiok ka puncaknyo. Musojik Istiqlal la pulo adiok sholat di situ,” Kato Mi’a basamangat.

Koniong Ocu Sanggam bakowuik.

“Nan lomak le Cu, di Taman Mini Indonesia Indah. Di situ aghi adiok lamo baobikan…” Kato-kato Mi’a taputui.

“Eh tapi adiok ka Surabaya, itu Jakarta nan adiok cuitokan du…” Nyie Cu Sanggam batanyo panasaran.

“Itu tio, Cu. Wakotu di dalam pasawat adiok kenalan jo amak-amak. Inyo la tuo ndak pulo ado nan mangawaninyo, do. Jadi katimbang pai jalan-jalan lobio elok adiok antau amak tuo du ka uma cucunyo di Jakarta Pusat. Jadinyo dek bantuan adiok tadi kaluarga amak du mambo adiok jalan-jalan kuliliong Jakarta. Condo itu Ocu,” Cuito Mi’a yokin.

Ocu Sanggam maongguok-ongguok, “Tu ndak jadi adiok pai ka Surabaya, Semarang, Yogya, jo Bangdung?” Tanyo Ocu Sanggam.

Mi’a manggeleng copek, “Ndak do, Cu. Sobab adiok pikiu, buek apo jalan-jalan di nagoghi ughang kalau sasuda itu maninggekan ponek jo poniong. Sobab, sapulang jalan-jalan piti abi, sodangkan awak parolu modal untuok manjalankan usaho. Tu, Ocu ba’apo cuito, nyilegho ka Hongkongnyo?” Tanyo Mi’a.

Ocu Sanggam manjawab, “Hampio samo cuito awaknyo, diok. Kutiko masih manunggu pasawat, Ocu kenalan jo Mahasiswa Kampar awak yang kebetulan nak pai kulia baliok ka Jakarta. Namonyo Taufik,” Kato Ocu Sanggam mamulai cuito.

“Nyie Taufik, kalau nak kolu nagoghi  awak harus punyo guide. Artinyo punyo pemandu yang manguasai bahaso Hongkong. Dek Ocu ndak punyo guide sudatu takuik-takuik kalau ndak dapek pulo guide di Hongkong,” Ule Ocu Sanggam. Mi’a mandongaukan serius.

“Lagi pulo nyie Taufik di Hongkong banyak mafia-mafia. Bisa-bisa awak baniat hanyo untuok jalan-jalan kono mafia pulo di nagoghi ughang. Cukuikla di kampuong awak sajo awak dimafia dek ghang awak sandighi,” Lanjuik Cu Sanggam.

“Jadi…?” Tanyo Mi’a.

“Yo, saran Taufik wakotu itu, kalau hanyo nak manengok suasana Hongkong, pai jola ka Bagan Siapi-api. Di situ kan duplikatnyo nagoghi Cino. Pikiu punyo pikiu Ocu gagalkan ka Hongkong. Babelok’n ka Bagan Siapi-api,” Nyie Ocu manjawab.

“Lagi Pulo Ocu pun bapikiu samo jo adiok. Usaho awak untuok mansejahterakan kaluarga parolu piti banyak. Untuok apo awak buang-buang piti ka nagoghi ughang samantagho apo nan awak cai di nagoghi ughang siton olun tontu cocok untuok awak. Biala anggota dewan jo Pemda awak nan pai kolu nagoghi maobin piti banyak, samantagho hasilnyo juo ndak jole bagi kemaslahatan nagoghi ko,” Nyie Ocu Sanggam tanpa baniat manggurui bininyo. Apolagi manggurui ughang lain.

Mi’a ma’ongguok-ongguok satuju.

“Iyo lo ‘so yie, Cu…” Ule Mi’a, “Untuok apo awak bafoya-foya kalau ndak ado hasil nan jole,” Kato Mi’a kamudian.

“Itu tio. Lagi pulo di Bagan Siapi-api Ocu potang manengok atraksi nan samo jo atraksi nan ado di Hongkong. Atraksi Barongsai namonyo, onde ancak juo kosan tradisi ughang, du,” Seru Cu Sanggam.

“Ooo, lai sompat nengok atraksi Barongsai Ocu, nyo? Samo tio awak. Di Taman Mini adiok manengok tradisi Kuda Lumping punyo Ughang Jawa. Hebat, Cu. Kudo Lumpiong du makanannyo kaco. Indak pulo kaco nan ancak, do. Kaco-kaco buwuok nan la poca. Dikunya dek’e condo Ocu makan Joyiong mudo,” Nyie Mi’a polos.

Ocu Sanggam bakowuik koniong’o.

“Gawat du yie, Cu. Ado-ado nan dimakan dek ughang go yie. Ndak nasi ajo do, kalau Barongsai du apo pulo makanannyo du, Cu?” Mi’a ngecek liok sambio batanyo.

“Ah, adiok. Condo indak tontu jo makanan Barongsai, ma. Barongsai du, kan parumpamoan Ulek Nago. Ulek  khan ndak ponanyo mangunya, do. Tapi malulu. Kalau mangsanyo la dokek, dilulu dek’e. ndak pakai kunya-kunya bagai do,” Urai Cu Sanggam.

“Ulek memang malulunyo, Cu. Apo pulo umpamo mangsa Ulek Nago du, Cu?” Tanyo Mi’a baliok penasaran.

“Yo kalau missal ulek Mugho makanannyo khan ado ayam, kambiong atau kondiok. Kalau la Ulek Nago du, makanannyo godang. Yo kalau awak ibaratkan mangsanyo condo APBD la kigho-kigho,” Jole Ocu Sanggam.

Dilanjuik’in deknyo, “Kalau Nago la konyang kini du, tingge lolok jie le manunggu APBD taun isuok pulo untuok dilulu kasodo dek’e. sampai kacighik-cighik dikunya dek’e,” Nyie Ocu Sanggam,” Sahinggo tingge kaco-kaco poca untuok Kudo lumpiong, le…”

“Dilulu bukannyo dikunya,” Kritik Mi’a.

“Nah, iyo dilulu mukosuik Ocu.” Beki Ocu Sanggam.

“Tapi olun juo tontu le, Cu. Kalau Kuda Lumping lah manggane pulo, nta condo apo-apo pulo main gak’a du, Cu. Sodangkan kaco lai dimokan dek’e. apolagi nan lomak-lomak condo APBD du…..” Nyie Mi’a.

Pambicaraan ughang baduo du taonti dek kadatangan Ucok, sang kontraktor. “Assalamu’alaikum, Cu Sanggam….” Ucok manyapo jo salam.

“Wa’alaikum salam….” Jawab laki-bini du hampio sarentak.

“Apo tio Ocu Ucok? Khan mambayiu utang potang?” Tanyo Ocu Sanggam sabolum sompat Ocok mangecek.

Ucok Nampak togak pinggang di dopan Ocu Sanggam. Mi’a manjaghak, karono iko urusan laki-laki, nyie batin Mi’a.

“Itulah Ocu, sudah berulang kali deyen ka siko, Ocu indak ado do….” Kato Ucok mamakai bahaso Ocu samantagho logat Bataknyo totap babaun. “Nak tambah batu tigo motor le Cu, suda itu kosiok ompek motor prah. Indak cukuik bahan nan potang do,” Jawab Ucok santai.

“Ndeh, den sangko kan mambayiu utang wa’ang pulo le, Cok. Kosan manamba utang ang komai,” Timpo Cu Sanggam. “Kan lai baansu utang nan lamonyo kan?”

“Sabarlah dulu, Cu… piti proyek olun kolu le. Kalau ndak salosai proyek usak proyek tu beko kalau ndak ocu tamba utang den. Yo kalau Ocu ndak bisa mambai utang den mintak ka Suman toke batu subola iton, kabarnyo lobio mugha daghi pado Ocu, ” Sambuik Ucok banado ancaman.

“Nde wa’ang le yie yuong. La indak mambayiu utang deyen pulo wa’ang adu-adu jo Pak Suman. Nak jadi apo wa’ang di nagoghi ko. Nak manjajah kami wa’ang. Bayiu jielah utang wa’ang du. Jan kami pulo wa’ang adu domba, le. Condo Balando ‘ang goma. La merdeka awak go’ang. Ngaroti ndak?” Soga Ocu Sanggam.

Ocu Sanggam kughang pue mangotai-ngotai, “Wa’ang koton usaho wa’ang ajo nan usak, usaho deyen pun akan usak pagha dek ulah kolian bautang-utang, du… bayiu copek utang nan la jatuo tempo, du. Copek!” Soga Ocu Sanggam baliok.

“I, iyo cu Sanggam. Sabar, Cu…. Bekok malam den antar piti Ocu tu,” Pinto Ucok gagok. Pucek juo kosan Ucok konai soga Ocu Sanggam du.

“La lotio kami rakyat bawah go dek basabar, ang,” Nyie Ocu Sanggam kamudian.

Ucok kangkung-kangkang pai naiok sedan Balenonyo. “Astagfirullah….” Ucap Ocu Sanggam manyosal la emosi barusan. Inyopun kamudian masuok uma, manyusul bininyo nan sodang ambiok wuduok untuok Shalat Magrib bajama’a di Musojik. (***

 

 

 

 

 

Komentar Facebook